LET-REVIEWER-FILIPINO

 

Pagbasa

 

Mga papanaw ukol sa pagbasa:

 

• Ang pagbasa ay isang masalimuot na prosesong pangkaisipan kung saan ang mambabasa’y aktibong nagpaplano, nagdedesisyon at nag-uugnay ng mga kasanayan at istratehiyang nakatutulong sa pag-unawa. 
• Ang pagbasa ay isang kompleks na gawaing kinapapaloooban ng may kamalayan at walang kamalayang paggamit ng iba’t ibang estratehiya, kasama na ang mga estratehiya sa paglutas ng suliranin upang makabuo ng modelo ng kahulugang ninanais ipahatid ng awtor (Jonhston, 1983). 
• Ang pagbasa’y proseso ng pamimili ng mga pahiwatig pangwika batay sa ekspektasyon ng bumabasa.  Habang ang bahagi ng impormasyon ay nakikilala, nakagagawa ang mambabasa ng pansamantalang desisyon o hinuha na patutunayan niya, iwawaksi o pagtitibayin habang bumabasa  (Kenneth Goodman, 1976).
• Dahil magkaugnay ang pagbasa at pag-iisip, binanggit ni Mikuleckey (1990) ang ginawang pagtutulad nina Kintsch at Van Dijk (1978), Rumelhart at Ortony (1977) at Winograd (1977), sa pagbasa sa pagpoproseso ng impormasyon upang maunawaan kung paano nag-iisip at umuunawa ang isang tao.  Ayon sa kanila, dalawang aspekto ng “human information processing system” ang nagkakatulungan kapag nagbabasa ang isang tao:
• Concept Driven o Itaas-Pababa – kapag ang bumabasa ay higit na nakatuon sa kug ano ang alam niya upang maintindihan ang binabasa.
• Data Driven o Ibaba-Pataas – kapag higit na umaasa ang bumabasa sa mga impormasyong tekstwal.

Ang Mapanuring Pagbasa

 

• Ang mapanuring pagbasa ay isang halimbawa ng marahan at maingat na pagbasa na nangangailangan ng masusing prosesong pangkognitibo.  Pangunahing layunin nito ay malayang pag-iisip at kasanayan sa pagsusuri a pagtataya. 

Mga Kasanayan sa Mapanuring Pagbasa

 

1. Paghinuha sa maaaring mangyari
2. Pagpapangkat ng mga ideya
3. Paghahambing at pagtutulad
4. Pagtatangi ng katotohanan sa palagay/opinyon
5. Pagbuo ng konklusyon
6. Pagbibigay ng sanhi at bunga
7. Pagkakasunud-sunod ng mga ideya
8. Paglalagom
9. Pagtukoy at pagpapahalaga sa katangian ng tauhan
10. Pagsusuri ng mga impormasyon
11. Pagpapakahulugan sa matatalinghagang pahayag
12. Pagpapakahulugan sa mga pahiwatig ng pahayag
13. Pagtukoy sa magkakaugnay na ideya/konsepto
14. Pagtukoy sa suliraning tinutukoy sa binasa
15. Pagbibigay reaksyon sa himig at tono ng seleksyon   

 

Proseso ng Pagbasa

 

• Ang pagkuha ng impormasyon ay di lamang nakakamit sa pagbasa ng mga nakalimbag na sagisag.  Mayroon ding mga impormasyong ginagamit ang bumabasa na nasa kanyang isipan na kanyang binabalikan kung kailangan niya sa pagbasa ng teksto.  Ito ay ang mga di biswal na impormasyon ng binubuo ng datihang kaalaman (prior knowlegde). 

 

Teoryang Iskema sa Pagbasa

 

• Ginagalugad ng mambabasa ang mga nakaimbak o nakalagay niyang network ng mga abstraktong ideya sa kanyang isipan upang humanap ng iskema na tumutugma sa mga elemento o impormasyong taglay ng teksto (Anderson, 1985).
• Habang bumabasa, patuloy na naaapektuhan ng makabuluhang iskemang nagising ang pagpoproseso ng impormasyon.  Sa pamamagitan ng nagising na iskema, naghihinuha ang mambabasa ng mga impormasyong semantika, sintaktika at leksikal upang makabuo ng kahulugan.

 

Metakognisyon sa Pagbasa

 

• Pagkakaroon ng kamalayan, kaalaman at kasanayan sa pagkontrol sa sariling proseso ng pag-iisip o pag-unawa.
• Ang metakognisyon ay ang mataas na kasanayang pampag-iisip na kinapapalooban ng aktibong pagkontrol sa mga prosesong kognitiv na napapaloob sa pagkatuto (Livingston, 1996).
• Sa pamamagitan ng metakognisyon, nalalampasan ang kognisyon dahil nagagawa nitong malinan sa mambabasa ang may kamalayang paggamit ng mga estratehiyang kognitibo at pahalagahan sa halip na simpleng gamitin lamang ang mga ito.  Binibigyang-diin ng metakognisyon ang malawakang kontrol sa mga proseso sa halip na sa mga tiyak na estratehiya o gawain (McNeil, 1987). 
• Tatlong Uri ng Prosesong Metakognitiv Ayon kay McNeil:
• Kaalaman ng mambabasa sa kanyang sariling kahinaan at kalakasan sa pagbasa;
• Kaaalam kung alin estratehiya ang angkop na gamitin ayon sa sitwasyon; at
• Kalaaman ng mambabasa sa pagsubaybay sa kanyang pag-unawa o pagkaalam kung kailan siya di na nakauunawa.